ERLIPPANNI KILORLERNI KIGUTISSATIT PUTTUTEREERPAT?

Amerlanerit erlippamminni kilorlerni kigutissaat 20-it missaanni ukioqaleraangata puttuttarput. Tamakkiisumik sisamanik erlippanni kilorlerni kigutitaartoqarsinnaavoq, allermi marluk qullermilu aamma marluk.

Erlippanni kilorlerni kigutitaarneq amerlanertigut iluaqutaasanngilaq aammalu qanerni inissakilliortitsiinnartarlutik, inuit piffissaq malillugu alleqqui milliartornikuummata. Taamaammat erlippanni kilorlerni kigutit ajornartorsiortitsikkajuttarput anniartitsisarlutillu.

ERLIPPANNI KILORLERNI KIGUTIT

Erlippanni kilorlerni kigutit puttuttarneri assigiinngitsumik pisarput. Ilaatigut sanimut alleqquni inissisimasarput ajornartorsiortitsinatik aammalu puttunnatik.

Erlippanni kilorlerni kigutip ilaannaa aamma puttussinnaavoq, taannalu aseruutitsilersinnaavoq anniartitsilluni, aappillertitsilluni pullatsitsillunilu. Aseruunneq suliarineqarallarsinnaasarpoq, kisianni kingusinnerusukkut pisariaqartuaannarpoq kigutip peernissaa.

Pisut ilaanni erlippanni kilorlerni kigutip kigutillu tullianiittup akornanni ikkini itinersaqalersinnaavoq. Taamaattoqartillugu piffik salikkuminaassisinnaavoq, bakteriat amerligaluttuinnarlutik cariesseqalertitsisinnaallutik imaluunniit piffimmi paradentoseqalertitsisinnaallutik.

Erlippanni kilorlerni kiguteqarsoriguit imaluunniit pasitsaakkukku puttunnialersut kigutileriffitsinni misissorsinnaavarput alleqqunni inissaqarnersut imaluunniit ajunnginnerunersoq peerneqarpata.

QAQUGUKKUT ERLIPPANNI KILORLERNI KIGUTIT PEERNEQARTARIAASARPAT?

 

  • Erlippanni kilorlerni kigut salikkuminaappat aseruuppat aammalu ikkinni aappillersitsippat peerneqartariaasimassaaq.
  • Erlippanni kilorlerni kigutip kigutillu tullianiittup akornanni ikkini itinersaqalersimappat.
  • Erlippanni kilorlerni kigutimi kigutillu tullianiittumi cariesseqalersimappat.
  • Kigut inissaqanngippat, kigullu tulleq ajornartorsiortippagu.
  • Kigutip erlippanni kilorlermiittup qalliutaani pullartanissimappat imarualimmik (cyste).

 

SULIARITINNEQ PILLUGU NALINGINNAASUT

Pisut ilaatigut erlippanni kilorlerniittuni kigut allat kigutit assigalugit peerneqarsinnaasarpoq, tamanna kigut puttulluarsimagaangat pisinnaasarpoq. Kigut ilaannakortumik puttussimappat imaluunniit suli puttussimanngippat, erlippanni kilorlerni kigut suliaritinnikkut peerneqartariaqartarpoq.

Erlippanni kilorlerni kigut taassumalu manngua alleqquni sumi inissisimanersoq kigutilerisup takuniarlugu qinnguartaammik assiliisarpoq. Pisut ilaanni erlippanni kilorlerni kigut peeruminaassinnaasarpoq, taamaakkaangallu suliaritittussaq immikkut kigutinik – qanermik – aammalu –alleqqunik ilisimasalimmut kigutilerisumut innersuunneqartariaqartarpoq.

Suliaritinneq avatangiisaanuinnaq qerititsinermik aallarniuteqartarpoq, taava eqqumallutit suliarineqassaatit, suliaritinnerit tusaasinnaallugu malugipajaarsinnaallugulu suliaq sumut killinnersoq.

Erlippanni kilorlerniittuni kigutitit peerneqassappata, innersuussutigineqartarpoq illuatungaannaa aallartitsissutigineqassasoq, kigutivit illuatungii suliaritinneqanngitsut nalaanniittut nerillutit tamuffasigillugit atorsinnaaniassagakkit.

 

SULIARITEREERNERUP KINGORNA

Suliaritereernerup kingorna pullattuulaarneq nalinginnaasuuvoq. Ikeq eqqissisimaartinneqassaaq, timillu aalatippallaannginnissaa ulloq siulleq innersuussutigineqartarluni. Ikerminngaanniiit aanaartoqarsinnaavoq, tamannali mattutissiamik milinngateqqaarneqarsinnaavoq. Amerlanerpaat erlippanni kilorlerni kigutaarsereeraangamik anniarsinnaasarput, taamaakkaangat nipaallisaatit pisariaqalertarput. Ulloq siulleq suliaritereernermiit nerisat mianersuutassaapput, qerititsissut peqqutigalugu imminut uluakkut kimmannginnissaq pinaveersaartinniarlugu.

Pitsaanerusarput aqitsunik nillertunillu nerinissaq. Ikip eqqiluitsuunissaa pingaaruteqarpoq, kisiannili ikeq kigutigissarneqassanngilaq. Ajunngilluinnartumik klorhexidin 0,12% atorneqartarsinnaavoq, kilut peernissaasa tungaannut. Klorhexidin bakterianik toqoraasarmat. Pingaaruteqarpoq klorhexidin atoraanni kigutigissarneq taassuminngalu atuineq imminnut akunnermik ataatsimik akuttoqatigiisinnissaat.

KIGUTILERISOQ APERIUK